الأربعاء، 6 يناير 2010

خيانة صديق






(( خيانة صديق ))



في حياتنا اليومية حين نُسأل عن رفيق غالبا يكون الجواب (هذا فلان صديقي) لكن هل فلان هذا فعلا يحمل معنى الصداقة الحقيقي ام هي كلمة اصبحت تستخدم في غير محلها؟؟ما مفهومك الشخصي عن الصداقة ؟؟


بقولكم سالفة سمعتها من زميلتي في العمل , انا صراحة عن نفسي انصدمت ولو كنت مكانها مستحيل أسوي سواة هالبنية !! :S


الله يسلمكم تعرفت وحدة على أحد شباب ديرتنا , مع مرور الوقت حبته و كان كل ما يتصل عليها تكون تكلم رفيجتها نورة و تشبك الخطوط و يسولفون ثلاثتهم (( البنت و حبيبها و نورة ))


ومره مرتين ثلاث , تعود الشاب على وجود نورة بحياتهم و صار يسأل عنها من بين فترة و فترة , ولما يا وقت سفرة الشاب الى الخارج لتكملة دراسته (( الماستر )) طلب من حبيبته أن تأتي الى المطار لتشاهده من بعيد قبل سفره وطلب منها أن تحضر نورة معها , استغربت حبيبته فقال لها : (( عشان اذا اسألوج أهلج مع منو بتروحين قوليلها مع نورة عشان مايحاتونج ))


المهم ذهبوا للمطار وشاهد الشاب حبيبته و نورة جالسين في ستاربكس , وكان من قبل معجب بسوالف نورة و لما شافها بالحقيقة أعجب فيها أكثر .


وصل الشاب الى أمريكا و بعد وصوله قام بارسال رسالة لحبيبته ((you are like my sis )) !!

انا كنت أظن اني احبج بس اكتشفت ان لأ انا غلطان و انتي بحسبت اختي !!
وافقت البنت على الانفصال لأن لا يمكن ان العلاقة تكتمل بحب من طرف واحد ..


بعد يومين .. قام بارسال رسالة أخرى (( نورة رفيجتج مرتبطة ؟؟ ممكن تطلبين منها اني معجب فيها و ابي أكلمها )) .. شهالوقاحة !!!

البنت انصدمت ومن صدمتها قالت له (( أشوف أسألها و أردلك خبر )) !!

اسالت البنت نورة صديقتها ووصلتها كلام حبيبها عنها , وبما أن الشاب موظف و من العوايل الكبيرة جدا بالكويت كان ردة فعل نورة (( هاا ما ادري .. ممم قوليله اوكي بس على شرط ان يتقدملي بعد أول مكالمة ))


أنا بفهم شلوون جذي !!! شلون تقبل تكلم أو يكون لها علاقة بحبيب صديقتها !! وين التقدير وين الصداقة معقولة هالأنانية و ماتفكر بمشاعر صديقتها حتى لو انهم انفصلوا !!


نصيحة لكل وحدة أو واحد يحب أو متزوج أو متزوجة
اذا تعرض لها أي شاب تطلب منه أن يطلب يدها اذا كان يريدها
أنا أقول ان البنت غلطت بادخال صديقتها بحياتها الشخصية وهي سبب انتهاء علاقتها بالشاب + علاقتهم بالهطريقة غير مضمونه ولا يقبل بها ديننا
((لادخلون أصحابكم بحياتكم الخاصة ولو كانوا أقرب الناس لكم الشيطان ما مات ))
طبعا أكيد كل شي خيرة بس المفروض نحتاط و ناخذ الحذر من الي حوالينا ..
أتمنى اني ما طولت عليكم بسالفتي بس أبي رايكم بالموضوع
ناطرة ردودكم






هناك 24 تعليقًا:

  1. الصراحه الغلطه من الريال نفسه لانه مو كفو وعينه زايغه لو يحب البنت صج وتارسه عينه لو شنو ما يفكر في غيرها

    تلقينه اهوا كان مقزرها معاها ولقى نوره وانعجب فيها ويمكن يكون بس اعجاب مو ""حب"" وبيصير مصيرها نفس مصير البنيه

    بعدين شلون يرضى يحب وحده ويبي يتزوجها وكانت تكلم صديق او "حبيب" رفيجتها !!! اكيد ماراح يثق فيها

    نوره ماخذت حبيب رفيجتها اهوا الي قال يبيها واهيا ما صدقت على الله تلقينها كانت تتمنه اي فرصه حتى لو من واحد ثاني

    وبالعكس مو كل الرفيجات جذي بعضهم يحافظون على السر ويتمنون الخير لرفيجاتهم والبعض الآخر حقودين وما تتمنه تشوف رفيجتها مرتاحه ومستانسه

    والي مثل هالريال ماعليه حسوف ... يمكن يكلم نوره شهر اذا مو اقل ويتعرف له على وحده بأمريكا وينساها

    مشكوره :)

    ردحذف
  2. عزيزتي

    البنت الأولى صاحبة القضية "غلطانة بالثلاث" .. مو بس علشان دخلت "نوره" بحياتها الشخصية، لأن أساساً من البداية علاقتها بالشاب مو سليمة ولا صحيحة و يرفضها دينا ومجتمعنا بالدرجة الأولى!

    الحب شيء جميل ورائع لكن إذا اقترن بالحلال و أصبح بالنور عوضاً عن بقاءه في الظلام ..

    بالنسبة لقضية "خطف الحبيب" بحد ذاتها ممكن تحدث مع أي أحد مثل ما قلتي حتى لو كان متزوج وأنا شخصياً أعتقد إن الصداقة بين الناس لازم ما تتعدى الخصوصيات ومولازم ينقال كل شي يصير بحياتنا لأي أحد حتى لو لأقرب الناس ..

    تقبلي مروري ودمتي بخير :)

    ردحذف
  3. اسوأشئ هو الخيانة

    ردحذف
  4. شاي الضحى : عدل كلامج صج ماعليه حسوف
    ومن ناحية الصديقات بعد صح بس الوحدة لازم تعرف ترافج صح وما تفتح قلبها حق صديقتها الا لما تتأكد من طينتها

    شكرا :)

    engineer A :

    العلاقة 100% غلط و اتمنى تتعظ من هالموقف

    أشكر مشاركتج بالموضوع

    ردحذف
  5. SHARM : اكيييد عدل كلامك
    الله يبعدها عنا و عنكم انشالله

    شكرا على الرد :)

    ردحذف
  6. شوفي حبيبتي انا اقولج وجهه نظري ...

    الولد ما غلط تدرين ليش لانه من الاول اتبع نهج التعارف على شان يوصل للبنت اللي تلبي طلباته الخاصه واللي عقله يتشهي انه يسمع سوالفها ..

    انا عن نفسي لن ولن ولن ومن سابع المستحيلات حتى لو كان فيه انسان في حياتي خارج نطاق الزواج يعني ماكو شي يثبته عندي اني ممكن اقول حق صديقتي عنه لانه سبحان الله راح يحلوو بعيون رفيجتي او تبي تتعرف عليه او تبي تسمع السوالف اللي يقولهاا الخ الخ الخ

    مو بس جذي العلاقه بين المرأه والرجل اصلاا علاقه سريه الكلام والنقاش والحياه سواء كانت خارج قبل الزواج او بعد الزواج لاااازم تكوون في نطاق السريه
    ماكوو رجل يحب انه سوالفه تطلع لاحد بره لانه من الاول بعض احاديثه كاذبه مايبي ينكشف ولانه هذي مطنوخه تحبه راح تصدقه ولا راح تفكر اهيا صج ولا جذي
    انا جذي جني سلعه رخيصه اعرض نفسي عليه واعرض عليه رفيجتي واقوله ياالله يا باشااا طب واتخير الغلطه مو غلطه نوره ولا غلطه الولد الغلطه غلطه البنت من الاول اسمحت لنوره انها تدخل في علاقتها مع انسان مو اهيا اللي ربته ولا حملت فيه ولا تعرف شنو كان ماضيه الا من الكلام اللي قاله

    لووول اللحين ندش بالمزاج المرجووج :

    يعني اللحين فوق ما اهيا ضد عاداتنا وتقاليدناا هم اقوول لفلانه وعلانه انا اعرف هذاا من ورا اهلي تعالي شوفيه وياي شلوونه لا اتشييحط فيه

    تسلمييين حبيبتي ومشكووره انج دليتيني على مدونتج

    ردحذف
  7. أزال المؤلف هذا التعليق.

    ردحذف
  8. Amani :

    كلامج كله صح :)

    مشكورة حبيبتي على مشاركتج بمدونتي البسيطة :)

    ردحذف
  9. السلام..

    من صجها اهي لو تحبه صج جان ماكلمته 1 ..

    2 جان ماخلت رفيجتها تسولف معاه شكو ع الاقل تغار عليه :\

    بس زين قالت الصج لنوره في بنات يحقدون ومايقولون ..

    والاهم نوره خخخ عقب اول مكالمه يتقدم لا صراحة وايد محترمه ..

    ومشكوره..

    ردحذف
  10. اممم موقف صعب على البنت بصراحه ..
    بس اغلب النهايات جذي ,
    وموقف نورا اممم برايي طبيعي معجبه
    في هالوقت كل شي للاسف غير طبيعي صار طبيعي ..
    ع العموم اهو موقف مر بحياه البنت ياليت تتعلم منه
    وقواج الله

    ردحذف
  11. Cesc :
    اي والله صح واايد أشياء ماكنا نتجرأ نسويها قاعدة أشوف بهالوقت واايد ناس ما عندهم مشكلة فيها

    الله يستر علينا و على الناس أجمعين

    تسلم أشكر مرورك :)

    ردحذف
  12. للأسف هذي صداقات هالأيام...
    أول شي .. هذا الشخص مو عارف شنو يبي
    و ناويها لعب من البداية !!

    ثاني شي .. البنت هذي ساذجة و عفواً لكن غبية تقريباً

    و الثالثة ! هم ما عندها مبدأ ...

    سبحان الله .. الطيور على اشكالها تقع و هذول التموا على بعض !!

    انا مدهوشة أيضاً

    تحية

    :

    ردحذف
  13. صراحة اهي الغلطانة مفروض ماتدخل احد بينهم وانا اعرف ان اللي يحب احد يحاول يحافظ عليه كأنه كنز ومايخلي احد يشاركه فيه

    وبالنسبة للصداقة الحقيقية ماراح تعرفها إلا لما يصير لك موقف والناس تتخلى عنك ويطلعون لك المعادن الطيبة

    ردحذف
  14. هي لم تكن صديقة اصلاً .. كانت مجرد صاحبة وقت فارغ .. قضته معها وملئته بها ومن ثمّ اتهمتها بالصداقة
    وانا اقول اتهمتها لانها اتخذت لنفسها من لايستحقها ومن ثم رميت الذنب على الاخرين ..
    لو كانت صديقتها حقاً لنصحتها في أمر هذا الشاب ولم تقبل على صديقتها محادثة الأجانب ..اما ان تحدثه معها وتخرج اليه بصحبتها ذاك .. أول علامات خيانه الذات والصديقة
    تحمد الله انها لم تستمر في علاقة مع هذا الشاب وان الله كان راحما لها بإن ذاك وقع على من تشاكله ..
    تحياتي

    ردحذف
  15. انا بصراحة اتفق مع اماني انه الغلط الاول والاخير كان من البنت نفسها ...لامن الولد ولا من نوره
    والولد صارحها وقالها انه مايقدر يحبها كان من الممكن يكمل ويتسلى معاها بعدها يلعب على ربيعتها ..طبعا ها مويعني اني متفقه معاه لان الموضوع من اساسه غلط...ونورة كان لازم تحطي اعتبار لصديقتها اللي اكيد انجرحت من الولد والحين انجرحت من ربيعتها ..والله يعافينا ويستر علينا ويبعد عنا عيال الحرام ..

    اللهم استرنافوق الارض وتحت الارض ويوم العرض

    تقبلي مروري
    http://om-hrooby.blogspot.com/

    ردحذف
  16. اشكر مروركم و كل تعليقاتكم صحيحه

    اللهم اني اعوذ بك من شر نفسي و من شر الشيطان و شركه وان اقترف على نفسي سوءا أو أجره الى مسلم

    ردحذف
  17. الصراحه مااستغرب من السالفه لانه مثل السالفه صارتلي :) و صراحه عقب اللي صار ما اعتبرتها صديقتي : )
    u have a nice blog keep it up ;*

    ردحذف
  18. اول مرور لي لمدونتك ... بكل صراحه حبيتها وحبيت رقتها
    وبضيف كلمتين على قصتك ..خيانه الصديقه تكون قاسيه مش بس في الامور الي تدخل بالامور العاطفيه ..بس اذا كانت لها عمر طووووويل ..وحبيتيها بكل عيوبها ..وقبلتي فيها كاصديقها ..وبعدها تكتشفي غلطتك بعد 9 سنوات !!! انك اخترتي انسانه حسودة ووقفت بطريقك اكثر من مرة ..

    بس الحمدالله :)

    دمتي بود

    ردحذف
  19. والله يا اختي من الاساس العلاقه غلط مالها سالفه

    البنت الثانيه ذكيه عرفت شلون تستغل الفرصه قالت لها بعد المكالمه الاولى يتقدم لي

    انا ماشوفها انانيه بالعكس اذا رفيجتها متصله تقولها تبينه ولا ماتبنه ولا ماتبينه يعني خلاص

    اتوقع ان الاولى اهيه ماتصرفت بذكاء بالمفروض لمن قالها خلينا بس اصدقاء تقطع العلاقه من البدايه لأن هاذه انسان موكفو ولا يستاهل

    شلون انطرت بعد ايقولها ابي رفيجتج شلون تحملت هالكلام

    اشكرج على مدونتج وايد عجبتني

    ردحذف
  20. أزال المؤلف هذا التعليق.

    ردحذف
  21. أمبييييييييييييييييييييييييييييه من صجه هذا

    والله لو انا اقوله اقلب ويهك وانت ماتستاهل رفيجتي

    وصح كلامج حتى اقرب الناس لج ماتأمنين عليهم

    ومثل ما قلتي الشيطان ما مات

    تقبلي خالص ودي ..

    ردحذف
  22. بصراحة وين بهالزمن تلقين ريال بمعنى الكلمة

    و هذا لو ريال صج و قال لحبيبته احبج

    ما زاغت عينه يمين او يسار

    اهمه ثلاثهم غلطانين

    الاولي لانه كانت تكلمه مع رفيجتها

    و الريال ماشالله ما صدق على الله

    و رفيجتها لو صج تتمنالها الخير جان ما كلمت صاحب رفيجتها

    يعني لو اهيا تفكر جان قالت مثل ما هد رفيجتي راح يهدني

    و مثل ما لعب عليها يلعب علي

    تحياتي

    ردحذف
  23. مساء الخير

    صج وين قاعدين

    وعفية انسان بالشكل هذا

    وصج اللى قال اللى اختشوا ماتو

    وبعدين

    الشخص هذا ما تجرا الا احتمال انه شاف شى من صديقتها

    بس اللى نقوله الله يصلح الجميع

    ردحذف